Reunion di Konseho Insular den Passangrahan atrobe
For di e siman akí ta tene reunion di Konseho Insular manera kustumber den edifisio di Passangrahan atrobe. Resientemente a finalisá e trabou grandi di mantenshon den e sala di reunion. Djárason último e promé reunion a tuma lugá; e reunion públiko solèm relashoná ku selebrashon di Dia di Boneiru i 72 aña di eksistensia di Konseho Insular di Boneiru.
Vários miembro di Konseho Insular a tene un diskurso. Temanan manera abolishon di sklabitut i e diskulpa di Kas Real relashoná ku esaki, i tambe fortifikashon di nos identidat boneriano i kolaborashon mutuo a bini dilanti. Koleganan miembro di Konseho Insular di Isla Riba tambe a hasi akto di presensia dia 6 di sèptèmber.
Sistema oudiovisual nobo
For di momentu ku a finalisá e trabou di mantenshon, Passangrahan ta disponé di aparatonan oudiovisual nobo i mas profeshonal ku diferente aktualisashon, entre otro señal di video Full HD, posibilidat pa partisipá riba distansia den forma virtual na e reunionnan i e asina yamá ‘name tags’ ku ta sòru ku di awor en adelante por mira e oradornan riba pantaya ku nan nòmber i nòmber di nan partido. Banda di esaki e sistema nobo ta ofresé vários funshon moderno.
Por ehèmpel personanan ku ta wak via wèpsait (web casting) fásilmente por haña un parti spesífiko bèk pa medio di ‘bullets’ ku ta keda kreá ku kada interakshon durante un reunion. Tin posibilidat tambe pa kompartí un sierto parti di un reunion ku otronan, sin tin mester di wak henter e grabashon bèk. Company Web Casting ta ‘stream’ e reunionnan i naturalmente por sigui wak nan ‘live’ via e diferente plataformanan, entre otro e wèpsait www.konsehoinsular.com, e página di YouTube di Konseho Insular (Eilandsraad), i tambe e kanalnan di televishon Nos Tv i Dutch Caribbean Tv.