Kontinuashon di reunion di Konseho Insular di 21 di ougùstùs
Dia 12 di sèptèmber ta reanudá e reunion di toma di desishon ku dia 21 di ougùstùs pa motibu di falta di kórùm no por a kontinuá. Esaki ta planiá pa 16:00 or den sala di reunion di Passangrahan. Durante un reunion di toma di desishon ta tuma sierto desishonnan. Un kórùm ta e kantidat mínimo di persona ku mester ta presente pa por laga un reunion òf prosedura di votashon tuma lugá legalmente. Den Konseho Insular, kaminda tin nuebe asiento pa repartí, mester tin por lo ménos sinku miembro di Konseho Insular presente.
Ta reanudá e reunion for di punto di agènda 5 i e ta kontinuá te na e di 11 punto di agènda. Kolegio Ehekutivo tambe lo ta presente. Pa votashon tin e proposishon relashoná ku eliminashon di un punto di agènda i no presentá dokumentunan pa votashon pa motibu di falta di tempu di preparashon. Tambe ta presentá algun dokumentu pa aprobashon, entre otro e Ordenansa di sistema di traha di Komishon Fiho, e Dekreto di Konseho Insular konteniendo instrukshonnan i mandato di Grefir Insular, e Ordenansa Enkuesta di Konseho Insular Boneiru, E Dekreto di Konseho Insular pa aprobashon di e Nota di Konseho Insular ‘Meta, Manera, Medio’ ku ta trata stipulashon di maneho i dokumentunan i formularionan athunto i e Ordenansa di Informashon i Toma di Desishon Konseho Insular Boneiru 2023.
Otro reunionnan
Mas aleu e siman akí tin dos reunion di komishon planiá riba djárason 13 i djaweps 14 di sèptèmber. Riba djárason e komishon fiho pa Komunidat i Kuido ta reuní, kaminda nan ta bai papia tokante e situashon aktual di kuido di laboratorio i di BonLab en partikular, e situashon aktual relashoná ku e plan pa e aña di konmemorashon di pasado di sklabitut, kon ta sigui despues di e diskulpa, un kontinuashon di e situashon aktual relashoná ku e diseño di ordenansa di supsidio i tratamentu di kartanan di opheshon entregá. Riba djaweps e komishon fiho pa Relashonnan Interinsular i Relashonnan den Reino ta reuní, kaminda ta bai papia tokante progreso di e aktividatnan rònt di revishon di WolBES i FinBES, preparashon di e órgano di kolaborashon di islanan karibense i formashon di Gabinete na Den Haag.
Ta pone tur konvokashon riba e parti públiko di e sistema di informashon di Konseho Insular (www.konsehoinsular.com). Te asina leu ku ta aplikabel, manera ta kustumber ta pone e dokumentunan enbolbí disponibel pa tira bista aden na Grefi. Ta transmití e reunion ‘live’ via televishon i kanal di YouTube i wèpsait di Konseho Insular. Suidadanonan i prensa tambe ta kordialmente bon biní pa presensiá e reunionnan. Pa esaki a drecha un tribuna públiko den sala di reunion di Passangrahan.
Galeria di Portrèt
