Konseho Insular ta trata konsepto di presupuesto di Entidat Públiko Boneiru

Siman pasá durante e reunion di komishon di Komunidat i Kuido a trata sierto partinan for di e presupuesto ku tin di haber ku entre otro enseñansa, kultura, deporte, trabou sosial i siguridat sosial. E miembronan di e komishon a pone prinsipalmente hopi énfasis riba (falta di) maneho. Nan tabata di opinion ku Kolegio Ehekutivo no ta indiká sufisientemente kua maneho ta forma base di e sumanan menshoná. Tampoko nan no a manda e dokumentunan konserní pa Konseho Insular.

E siman akí e debate a sigui durante un reunion di komishon fiho di Planifikashon i Desaroyo, kaminda Kolegio Ehekutivo a duna splikashon na Konseho Insular tokante e tópikonan den e presupuesto ku tin di haber ku entre otro kambio di klima, maneho di tereno, fasilidatnan di bibienda, tráfiko i infrastruktura. Ora ku tur komishon kaba trata e presupuesto, ta na Kolegio Ehekutivo pa eventualmente hasi adaptashon, di manera ku seguidamente por trat’é den un reunion di Konseho Insular di forma opinion.

Stipulashon di presupuesto
Un presupuesto ta un balotashon anual ku Entidat Públiko Boneiru ta hasi di su entradanan i gastunan pa e próksimo aña. Legalmente Konseho Insular komo esun ku ta responsabel pa e presupuesto tin ku stipulá e presupuesto, di manera ku Kolegio Ehekutivo por entregá esaki na ministerio di Asuntunan Interno i Relashonnan den Reino pa aprobashon promé ku 15 di novèmber. E stipulashon ta tuma lugá den un reunion di Konseho Insular di toma di desishon, kaminda e miembronan di Konseho Insular durante un ròndu di votashon por ekspresá nan aprobashon tokante e presupuesto definitivo òf nò. Solamente despues di stipulashon di e presupuesto por hasi uso di e ‘budget’-nan konforme e presupuesto akí.