Konseho Insular ta risibí koleganan di Sint-Eustatius i Saba
Resientemente Konseho Insular a organisá un enkuentro informal ku miembronan di Konseho Insular di Sint-Eustatius i Saba, ku e meta pa estrechá e lasonan ku e koleganan di e dos islanan di Isla Riba. Ámbos delegashon ku a biaha pa Boneiru relashoná ku selebrashon di Dia di Boneiru, tabata invitado tambe pa e reunion solèm na Passangrahan.
Durante e enkuentro informal a papia tambe tokante diferente tópiko di interes komun, entre otro kuido di salú i seguro di malesa, koherensia entre e islanan i entre Hulanda Karibense i Hulanda Oropeo, e kambionan ku ministerio di Asuntunan Interno i Relashonnan den Reino (BZK) a proponé unilateralmente den WolBES i FinBES i e kambionan proponé den e sistema di impuesto.
E desaroyonan resien akí i e preokupashonnan na tur e tres islanan a duna un impulso nobo na e idea pa fortifiká e kolaborashon mutuo i krea un plataforma permanente kaminda konseho insular di e tres islanan por topa ku otro, deliberá, atendé ku problemanan komun i forma solushonnan i opinionnan komun na un manera regular i struktural.
Galeria di Portrèt
